Jalta Ja Re - Chalta Ja Re

Khona na tu hai yeh jo iraade,
kya hua jo poore nahi woh vaade.
Yun to zarre se paani hai behta,
tu chaahe to usme khuda basa de.

Seencha hai tune jo isko itna,
kya hua jo tune chaanv payi na re.
Deepak hai tu jalta ja re, chalta ja re,
chaanv se naata kaisa tera,
bus aage raah dikhata ja re.

Kya hua jo zindagi teri na maane,
baaki duniya hai tere sirhaane.
Mat khona yeh roop tu apna,
sabse alag hai tu O' Deewane.

Kya falak aur kya kshitiz hai,
jo tujhko khud pe yakeen hai,
Paayega tu jo kuch bhi chaahe,
kuch bhi nahi jo na-mumkeen hai.

Bhar ke saare rang fiza main,
zindagi ko ek nagma bana le,
Indradhanush bane daaman tera,

aur baadalon ko aangan bana le.

Deepak hai tu jalta ja re, chalta ja re,
chaanv se naata kaisa, bus raah dikhata ja re.

Zara Zara Sa

Suraj abhi kuch der pehle dooba tha,
Thoda andhiyara sa bhi lagta tha,
Sar jo humne uthaya aur,
yeh aankhein bhi thodi ghumai.


To yeh taaron ka gulistaan tha,
aur ek ujala sa chandrama tha,
dur dur tak khula aasmaan tha,
kshitiz  bhi aaj to ruka tha.


woh aankhein bhi apni thi,
aur woh samaa bhi apna sa,
phir bhi kuch adhoora sa tha,
haathon main uska haath na tha.


aankhein thi num, aur gala bhara sa,
yaadon main tha woh thoda ghula sa.
palkon to humne kiya thoda jhuka sa,
aur deedar hua uska zara zara sa.

Jaadon ki sardi aur kunkuna sa paani

Woh Jaadon ki sardi aur kunkuna sa paani,
Teri meri, meri teri, phir woh kahaani.

Woh aag ke kinare raat main chai ki chuskiyaan,
Meri teri, teri meri, dooriyon main woh siskiyan.

Woh baadalon ki chaadar aur ye palakon ki zameen,
Meri teri, Teri meri, hamari yeh duniya hui rangeen.


Woh garmi ki loo, aur suraj ki tapish,
Teri meri, meri teri, apni yeh kashish.

Woh baraf ka pighalna, woh kohra aur dhuan,
Tera mera, mera tera, yeh pyaar hai phir hua.

Woh neele aasmaan main chaand ki athkheliyan,
Teri meri, meri teri chup chup kyun rangraliyaan.


Saundhi si khooshboo, Baarish ki pehli boond,
Tene maine, maine tene, apni aankhen moond.

Woh baarish ka mausam, bheegi si raatein,
Teri meri, meri teri, pyaari si hain baatein.

Woh baadal ki garaj aur paani ki tap tap,
Teri meri, meri teri roomani si gup shup.

Woh koyal ki kuhu, woh tota aur woh maina,
Tere mere, mere tere, batiyaye apne naina.

Unleashing my creativity after almost a decade, feel so good

Yup, after almost a decade, this diwali, decided to spend sometime creating something I used to do 9-10 years back, sitting in my aangan and make rangoli :-). And I feel so good :-)

Ek Din

Ek din sapnon main kuch aisi baarish hogi,
Pahaadon ko cheerati ek chanchal nadi hogi,
Hawaon main soundhi-soundhi si mehek hogi,
Kisi shaam kuch aise unse mulakaat hogi.

Yeh nazarein ek baar phir se betaab hogi,
Saanse roomani, dhadkanon main dhun hogi.
Yeh dil gayega, geet main unki hi baat hogi,
Dhoop to hai hi, narm chaon bhi sunhari hogi.

Woh saral hogi, mann main komalta hogi,
Julfein jo lehrayengi to bus raat hogi.
woh muskura jaye to kaliyan phool hogi,
Hase to baadal garaje, aur varsha hogi.

Jab milegi nazarein unse, to yun to khamoshi hogi,
Hoth chup, aankhon hi aankhon main baatein hogi.
Hum kuch kahein na kahein, aawaz hamari un tak hogi,
Hum unke dil aur woh hamare nazar-o-dil main hogi.

Rahoon main phir se phool honge, kaliyaan hogi,
Patjhad ke baad phir se suhaani vasant ritu hogi.
Sang khelenge holi, phir se zindagi rangeen hogi,
Deepak main phir jyoti, aakash main aatishbaazi hogi.

Jeene Ki Arzoo

After "Har Lamhe Bus Pal Do Pal Ke", phir se kuch mann hua
us pari ke baarein thodi baatein aur kar li jaayein, to bus yun hi - 

Har raat sapno main aati hai, kuch aisi baatein kar jati hai,
So jata hoon mithason main, lekin subah to phir ho jati hai.
Mar to gaye hi the hum, usne phir se nayi jaan dal di hai,
kuch aisa amrit diya hai, jeene ke sahi arzoo ab pa lee hai.

Mayne badal gaye hai zindagi ke, kuch sahi hai, baaki sahi ho jayenge,
socha na tha, zindagi ke mod kabhi kahaan kabhi kahaan le jayenge.
Hum khush rehne ka vada karte hain, khushi khushi sab seh jayenge,
Aap bus yunhi gungunate rehna, dhun to saath main hum dete jayenge.

Woh kehti hai kyun nahi bulaya sapno main mujhe pehle,
Main kehta hoon neend kahan thi inn aakhon main akele.
Kabhi dard ka ehsaas tha to kabhi kisi ko khone ka darr,
Ab aa gaye ho to rehna inn aakhon main yunhi ujale ujale.

Nahi jaanta hoon main ki yeh duniya mil payegi tumse kabhi,
Ek pyaari dost jiski aakhon main hai chupi baatein badi badi.
O Pari, Sach to yahi tumhare kaaran mili yeh zindagi nayi,
Iss dosti ko nazar na lage, khuda se maangte yahi dua abhi.

Har Lamhe Bus Pal Do Pal Ke

Jab us pari ne "Ruhaani si mehek" padha,
aur usne apni khushi ki jaahir,
Maine likh di phir kuch aur panktiyan,
kuch is tarah ban gayi woh meri prerna.

Pari hai ya hai woh ek sadharan insaan,
Dost to thi woh meri kabse, ab dost-e-khaas.
Yeh saara padhkar ho gayi woh bhi hairan,
Sochi, itne keemati hai uske yeh sab nishaan.

Lagi woh jhoomne, gaane, chikhne aur chillane,
Zameen kya falak tak bhi nahi the uske thikane.
Paro pe kaboo na raha, udd gayi door gagan main,
Fitoor tha yeh uska, le aayi bahaar chaman main.

Usne sikhaya kaise udte hain aasmaan main bin paro ke,
Aur ye bhi sikha maine ki kaise haste hai bin adharo ke.
Ashqon main bhi swaad hota hai jab girte hain gaalon pe,
Hamesha muskurate rehna, har lamhe bus pal do pal ke.

Tasavvur main hai woh, mere khwabon-khayalon main,
Khumari hai ab ya kuch iss tarah hi zindagi ki dagar hai.
Uth bhi jaye parda uski asliyat se to kuch khabar hai,
Uski woh baatein mere dil main ab shaam-o-seher hai.

Log puchte hain mujhse ki batao hai kaun yeh haseen pari,
Main kehta hoon sabse ki jaan jaoge aane do woh ghadi.
Rehne do parde main abhi, achi lag rahi hai woh chupi chupi,
Kya kaafi nahi hai itna, mere dil-e-nazar main hai woh basi.